aazad khayalon ki duniya

aazad khayalon ki duniya
masoom sawalon ki duniya
voh chechahate panchee,
aur titliyon ke peeche daudte,
nanhe kadmoon ki duniya

kahaniyan pariyon ki, aur kisse asmaani
ghar ghar ka khel, gude gudiya ka mel
bahut choti fir bhee bahut badi se duniya

Chot lagti aur mit jaati
Gam nahi koi,
dard ho to ansoon aajayein
magar dil mein tees nahi koi,
Tujhse naraz ho to lad jayein
par saalon kamosiyoon ka silsila nahi koi

Pyaare armaaon, mithe pakwaano
khilono ki dukano ki rangeen duniya
Diwali ke methayee, eid ki edee
fulzariyon aur chamkte taaron ki duniya

badi khaas, hai yaadon mein iska ehsaas
bahut peeche choot gayi
par maan ke kone mein ajj bhee
machalti, hilore leti hai ye duniya

Sochti hoon aaj, tanha mein..........

Sochti hoon aaj, tanha main
kyun na phir se rukh karun beete dino ka

Woh pehli dafaa tumse baat, phir baaton ka silsila
Kaano mein tumhare shabd, phir kai baaton ka ghulna
Pehli mulaqaat, intezaar mein tum - intezaar mein main
milna, cHoona haathon ka, milna nazroon ka, aur umadna jazbaaton ka

kyun na phir rukh karun un barsaaton ka, phirna geeli sadko par
sheeshe pe jame kuhase par naam likhna, tumhara mera
Phir yunhi tumhein dekh ke muskurana, aur qareeb aana

kyun na phir rukh karun un tanhayion ka, ki usme bhi hum saath the
ehsaas jude, jazbaat jude, yaadein judie, darmiyan bas pyaar
Aur doob jaana un palon mein bhool ke har fikr, woh meethi yaadein

kyun na phir se rukh karun beete dino ka
Sochti hoon aaj, tanha main

Kuch Ehsaas

Kuch ehsaas the jo bikhar gaye,
nazar ke tere iss fher mein,
hamaare sare khwaab ujad gaye

Asaan nahi hota youn paas aana,
aur namumkin hai fir dur jaan,
Kyoun tum itne paas aye
aur fir humse kinaara kar gaye?

Har lamha bhaari se lagta hai
ek tees uthti hai,
kuch chubhta sa ehsaas jagta hai
de ke vaade jannaat ke,akhir kyun,
meri jindagi mein yeah cubhan bhar gaye?

kaari kaari ratiyaan....

kaari kaari ratiyaan,bheegi mori akhiyaan
kase kahoon bolo,naino ki ye batiyaan
kaari kaari ratiyaan,bheegi mori akhiyaan
kase kahoon bolo,naino ki ye batiyaan

Mora aagan suna suna
sune more maan ki kothariya
bethi mein akeli, koi na saheli
ruthi hai mo se, mori saari sakhiyaan
Kaari kaari.....

Birhaa ki maari,sab kuch mein haari
rutha mo se har din, tadpoon mein pal cheen
ab to raha na, naino mein koi sapna
kaari kaari....

na jaanu mein, naam pata bhee
kis des ja ke, base hain piya ji
dhoondoon bhe to kaise
koi naa bataye, unki dagariya
kaari kaari....

kaise jiye koi,tum he bataao
jhuta hi dilasa, halki si asha
tum na aao to, bhejo koi sandesha
aake more aagan, deep he jalao
kaari kaari....

Ek ashk

Ek ashk nahi gira, par dil ka har katra lahoo luhaan hai
tere na aane se ek dil kya mera pura chaman viran hai...